الخميس، 11 أبريل، 2013

عندما اكتشتفت اني نوبيـاً...


من ساعة مااتولدت وامي دايما تقول اننا نوبين مش صعايده ولا فلاحين..وعشان كدا اتعودت ان كل ماحد يسألني في المدرسه انت منين؟ ودا كان سؤال متكرر نظرا لاختلاف لون البشره عن الطلاب العادين خاصة في منطقه زي شبرا كنت بجاوب دايما اني نوبي..وكان الرد الطبيعي "يعني من أسوان؟" ولسبب غريب مش قادر افهمه لحد دلوقتي ويمكن يكون بسبب كلام امي كنت بنفعل وأرد انا نوبي مش من اسوان وفي الاغلب في الفتره دي مكنتش اعرف ان النوبه دي في اسوان.
لم اعرف ماهي النوبه حقا لأسباب عديده منها تربيتي في القاهره وفي منطقه من المعروف ضعف اعداد النوبين فيها ورغم اني جدتي لاتتحدث سوي النوبيه والعربي بتاعها مكسر الا اني لم اتعلم اللغه النوبيه ابدا.يمكن لان امي لم تهتم بالامر ابدا ولم اهتم نفسي بتعلم اللغه فقد اعتدت فهم كلام جدتي بالتقريب...فمثلا لما كانت تصحي من النوم بالليل وتناديني وتقولي"إسي" افهم انها عاوز تشرب ميه ولما كانت الصبح تقولي "إتشي جوجر" افهم انها بتقولي ان اللبن سخن ومش محتاج تغليه وهكذا.
بداية اهتمامي بفكرة اني نوبي وبداية البحث عن ماهي النوبه وايه اللغه الغريبه اللي بسمعها من جدتي طول الوقت كان في الجامعه وبالتحديد في تالت سنه في الكليه"تاني سنه تخصص" في مشروع تصميم لوحه نحتيه وكل واحد في القسم اختار فكره ما وانا اخترت النادي الاهلي..قررت اعمل لوحه نحتيه عن النادي الاهلي"اه والله J" واكتشتف في اول سيكشن لتقديم التصميمات ان اغلب القسم اختار نفس الاختيار او الرياضه بشكلها العام فقررت اني اشوف حاجه تانيه اشتغل فيها لوحدي وجت في دماغي فكرة اني اعمل حاجه عن النوبه وبعد تفكير بسيط استمر 3 دقايق تقريبا اكتشفت اني معرفش اي حاجه عن النوبه....وبدأت ادور
اول حاجه قررت اني اعملها مش اني أسال جدتي او امي لكن كانت اني ادور ع النت و علي كتب عن النوبه وبدأت رحله بحث عن كتب عن العماره والتصميمات النوبيه استمرت لـ3 شهور...نادر اني الاقي كتاب في الموضوع دا ولما لقيت كان كتاب مستخبي في ركن مظلم في المكتبه و عليه تراب وعناكب وكان كتاب "العماره النوبيه_د/ثروت متولي" ورسالة ماجستير"آثر السمات الشعبيه علي التصميم الداخلي_م/سلوي يوسف" دا غير الكتاب المهم جدا واللي صدر في الفتره دي "رحلة في زمان النوبه_د/محمد رياض و زوجته الراحله د/كوثر عبد الرسول رحمة الله عليها"
وبدأت اقرا عن الزخارف والعماره والثقافه واستمر الموضوع معايا في سنه تالته ورابعه ،ومشروع التخرج كان عباره عن تصميم معماري لبيت نوبي مع مزج المفهوم الحداثي في العماره " هنا و هنا كمان" و في الفتره دي بدات اعيد سماع الموسيقي والاغاني النوبيه اللي عندنا في البيت بدات افهم بيتقال ايه في الافراح اللي كنت بحضرها سد خانه مش اكتر بدات اعرف تاريخنا وأصلنا وحضارتنا.
و رغم اني توهت في دوامة الشغل بعد التخرج الا اني قررت في مره اني اروح البلد في العيد.ازور قرشـه واشوف كل كلمه قريت عنها"انا روحت مره وانا عندي 4 سنين ومره وانا في ثانوي بس كانت سد خانه برضه مش اكتر" وكانت زيارتي المفجعه....بيوت زي المقابر زي علب الكبريت جنب بعض..شبه بعض وحياه غريبه،طب فين العماره والرسومات والقبب وعمارة الشمال والجنوب وكل الكلام دا؟؟؟
مقدرتش الاقي الكلام دا غير في غرب سهيل وبصوره ممسوخه كمان...كان التهجير دمر كل شئ..محي الصوره العظيمه اللي قريت عنها في الكتب وحلمت بها ورسمتها ،يمكن عشان كدا في  دي الفتره بدأ اهتمامي بالنوبه يتحول من مجرد عشق لتاريخ وحضاره وثقافه لاهتمام بقضيه...قضيتي وقضية ابويا اللي كانت كلمة النوبه بتنورعينيه رغم ان التهجير حصل وهو عمره 10 سنين...بدات افهم هو ليه دايما بيتفرج علي تلفزيون السودان اكتر من التلفزيون المصري..ليه بيسمع وردي والأمين والرايح اكتر من عبد الحليم وام كلثوم.
اكيد بحس بخجل اني مقدرتش افهم النوبه من وانا صغير ودا منعكس علي حياتي وصداقاتي لحد دلوقتي...لكن بحس بفخر كبير لاني دورت وحاولت اعرف وعرفت وعشقت مكان عمري ماعشت فيه و بحس بفخر اكبر لاني كل يوم بحاول اتعلم كلمه نوبي جديده و الاهم ان اصحابي غير النوبين"الجورباتيه" بقيت بعلمهم الكلام النوبي واحكيلهم عن النوبه والقضيه والثقافه وبدءوا يعشقوها هم كمان لدرجة ان في صديق ليا مش نوبي كل اما يتصل بيا في التليفون لازم يبدء المكالمه ويقولي "مين ابو امبيسا؟"
 

ليست هناك تعليقات:

إرسال تعليق