قبل
اي شئ وقبل اما تقرا في نقطتين لازم نتفق عليهم...
1_لو هتقولي ان في نوبين بيشجعوا مصر او لو هتقولي انا نوبي وبشجع
مصر فدا شئ لايعنيني ومالوش علاقه باللي كاتبه هنا و ياريت متكملش التدوينه
2_لو
شايف ان مقياس الوطنيه تشجيع منتخب كره فياريت برضه متكملش
المهم
بقا ندخل في الموضوع...
اولا
منتخب الكوره واتحاد الكوره و وزارة الشباب والرياضه كلها مش مقياس للوطنيه او
مقياس لاي شئ اكتر من الرياضه اللي بتتلعب ولاتمثلها الا في وقت اللعب فقط يعني
منتخب مصر لايمثل كرة القدم الا لمدة 90 دقيقه ورمزيته الوطنيه دي خلقها نظام
المخلوع مبارك بعد فشله في خلق اي مشروع قومي سواء اجتماعي او ثقافي لمده 3 عقود
متتاليه
ثانيا
السؤال المهم هو ليه انا قررت اشجع منتخب غانا مش منتخب مصر!!؟
للاجابه
علي السؤال دا لازم نرجع حوالي 17 سنه ورا تقريبا مع بداية وعيي كإنسان ودخولي
مرحلة الاعدادي. انا اهلاوي ومتعصب جدا و قضيت فتره طويله من عمري وراه من مدرج
للتاني في مواجهات محليه وافريقيه وعربيه وفاتني مواجهات كاس العالم للانديه في
اليابان وبس...وانا صغير كنت بقعد مع جدي الله يرحمه قدام الشاشه واتفرج ع الاهلي
والمنتخب وافرح للفوز و ارقص كمان لكن تاني يوم الصبح في المدرسه كنت مضطر اواجه
الفصل كله والمدرسين كمان لما يبدا الكلام عن الماتش ويبدا الهزار السمج وكله
بيكلمني ويقولي هزمناكم امبارح وكـأني كنت في الفريق التاني او في مدرجاتهم بشجع
رغم اني رقصت قبلها بكام ساعه بس وصقفت بعزم مافي في الطابور لما الولد اللي بيقرا
الاخبار قال نتيجة الماتش في الفقره الرياضيه بس دا كله كان شئ بشوفه انا لوحدي_في
الفصل والمدرسه كلها كانوا بيشوفوا اني افريقي ومش مصري...اسمي في فريق الكره في
المدرسه كان كالوشا ثم فليكس ثم كانو رغم اني كنت بموت في التراب اللي بيمشي عليه
الخطيب وبعتبره اعظم لعيب شافته عيني برا الملعب قبل جوا الملعب ومازلت مصر علي
رؤيتي له و اساسا انا كنت بلعب جون ثم مدافع في الثانوي.
اهم
المواقف المرتبطه بالكره وافريقيا بدأت مع فوز مصر بكاس الامم 1998 بهدفين لأحمد
حسن وطارق مصطفي_فاكر ازاي خلصنا الدرس بسرعه عشان نلحق الماتش وازاي جريت لحد
بيتنا عشان اتفرج واني قررت مقلعش الطاقيه لان مصر فازت الدور الـ4 وانا لابس نفس
الطاقيه وقعدت ادعي لحد نهاية الماتش والاحتفالات وازاي رقصت بعد الماتش وفاكر
كويس جدا ويمكن اكتر من لحظات الماتش ازاي اصحابي في المدرسه والدرس كانوا
بيتعاملوا معايا بعدها والتريقه انهم كسبونا والسود اتغلبوا هكذا.
الموقف
التاني هو كاس الامم 2006 ودي كانت نهايتي مع تشجيع المنتخب وازاي اكتر من حد ينده لي في الشارع ويقولي
يادروجبا وانهم حطوا علينا مع اني نزلت احتفل في الشارع وارقص زي المجنون وطبعا
بين الموقفين دول كان فيه عشرات المواقف سواء مع الاهلي او الزمالك حتي ومكنتش
بتفرق معاهم اي حاجه سواء كنت قاعد بشجع معاهم في القهوه او في الاستاد.
من
بعد كاس الامم 2006 وحتي هذه اللحظه قررت اني مش هشجع المنتخب مش لسبب معين لكن
لتراكمات عبر سنين طويله بالاضافه ان المنتخب المصري و رغم فوزه بـ3 بطولات
افريقيه متتاليه الا انه بالنسبه لي مقدمش اي اداء كروي مقنع علي عكس فرق افريقيه
كتير ومنها كوت ديفوار وغانا وصعود منتخبات مكانش لها اي وجود في القاره زي
بوركينا فاسو و اثيوبيا علي مستوي الاداء قبل النتائج وان المنتخبات دي كلها
مليانه لعيبه محترفين في البطولات الاوربيه وبيقدموا كره ممتعه في حين ان المنتخب
المصري اغلبه لعيبه محليه ومع ذلك بيتعامل المصريين معاهم انهم اعظم لعيبه في
الكوكب
ثالثا..سؤال
اخر واخير هل يمكن اعتبار مصر ومنتخبها افارقه؟؟
بالراحه
عشان الصدمه هل يمكن اعتبار مصر دوله افريقيه!!؟؟
مصر
دوله تقع جغرافيا بين قارتين اغلبها يقع داخل قاره افريقيا وجزء بسيط منها وهو
سيناء "المنسيه" تقع جغرافيا داخل قارة اسيا يعني لو مصر نقلت العاصمه
لسيناء هتبقي دوله اسيويه رسميا...المهم تركيا و روسيا دول تقع بين قارتين برضه
وهم اسيا واوروبا ولكن بيتم معاملتهم
دوليا انهم دول اوروبيه وبيلعبوا في البطولات الاوروبيه ولما تمشي في شوارع الدولتين
هتحس بمكس غريب مابين القارتين وثقافات القارتين..الكيان الصهيوني يقع جغرافيا ضمن
قارة اسيا ولكن بيتعامل انه اوروبي ولم مشيت في شوارع اي مدينه اسرائيليه هتحس انك
في حته من اوروبا
طب
مصر ورغم وقوعها الجغرافي في قارة افريقيا هل لما تمشي في شوارعها بتحس انك ماشي
في مدينه افريقيه!!!؟
بغض
النظر عن الصوره النمطيه للمدن الافريقيه في الاعلام الامريكي وبغض النظر عن
الصوره النمطيه للافارقه في الاعلام المصري فان في مدن افريقيه حديثه يعني مبنيه
علي طرز حديثه وبشكل معماري سواء في جنوب افريقيا او في غانا ومش بيمشي في شوارعها
اسود ونمور ولا مسلحين و متمردين بس سواء كانت حديثه او قديمه سواء كانت مبنيه علي
طراز السبعينات مع حركة التحررالوطني في افريقيا او علي طراز احدث او اقدم فانت
بتحس بقلب افريقيا النابض
مش
بس الشوارع والعمارات لكن المزيكا وطريقة الحياه الافريقيه البسيطه والجميله رغم
الحروب والصراعات والاستغلال الاوروبي والحكومات القمعيه والانقلابات...لو مشيت في
شوارع ابيدجان المحطمه من الحرب الاهليه او لو مشيت في شوارع كيب تاون الديمقراطيه
المنتصره علي العنصريه او شوارع اكرا الصاعده كنمر افريقي فانت هتحس بطابع افريقي
وحميمي في العلاقات بين البشر والمزيكا والثقافه وكل شئ.
طول
الوقت وفي قلب كتب التاريخ وبالتحديد من ساعة نهاية حكم الفراعنه وسقوط مصر في ايد
الرومان والعرب من بعدهم ونسيت مصر افريقيا او تناستها الا في محاولات فشلت في
اغلبها في الغزو والاستعمارولكن مع حركة العسكر واستيلائهم ع السلطه في منتصف
القرن الـ20 تحولت افريقيا الي ذكري منسيه..الاتجاه شرقا وتبني قضايا عربيه بحته
خلي النظام ينسي الجنوب اللهم الي في اضيق الحدود يعني دعم انقلاب النميري في 69
وحمايته من انقلاب تاني بعدها بعامين ودعم البشير وعساكره ضد ارادة الشعب وهكذاعلي
باقي القاره اللي لولا بطولات افريقيا مكانش مواطن مصري واحد مهما كانت درجة
ثقافته او تعليمه هيعرف اسم بلد فيها.
علي
المستوي الثقافي فمصر رضخت في مواجهة الثقافات الاوروبيه والشرقيه سواء الخليجيه
بطابعها الوهابي او الشاميه في الموسيقي
وتم اهمال الثقافات الافريقيه الموجوده في مصرجنوبا وغربا وتم تناسي عمدا ثقافات
النوبين والامازيغ والبجا والعبابده وتم اهمالهم علي مستويات التنميه والتعمير
ولاتتذكرهم الدوله الا في صورة الخونه الانفصالين اوفي صور مهينه كخدم وحشم سواء
في السينما او الادب..المطربين النوبين تم تكريمهم في اغلب دول اوروبا واتعمل عنهم
افلام وثائقيه ومع ذلك هناك اسماء لايعرفها 99.9% من الشعب المصري وكذلك كتاب
ومبدعين في مجالات مختلفه
منتخب
مصر وطوال سنوات عمري مشوفتش فيه اكتر من 3 لعيبه سمر"الكاس وعبد الستار صبري
وشيكابالا" والاخير هتفت ضده الجماهير هتافات عنصريه و وصفته بالقرد علي غرار
هتافات جمهور الريال في اسبانيا ضد الكاميروني ايتو لاعب البارسا
واللي رد عليها المجتمع الاسباني بحملات ضد العنصريه في حين تغاضي عنها المجتمع
المصري ولامن شاف ولا من سمع.
بعد
كل دا لو انت شايف اني خاين في عدم تشجيع منتخب كره لدوله بتتعامل معايا اني مش
مواطن فيها حتي لو دا بيتم بشكل غير رسمي وخارج اروقة الجهات الرسميه فانا اسف ليك
بشده اني ضيعت وقتك في قراية كلامي دا.
بس
انا كعادتي من 2006 ولحد الان بشجع ضد منتخب مصر في بطولة افريقيا والتصفيات
الافريقيه وكنت مبسوط لفشل مصر في الصعود لاخر بطولتين لافريقيا وهبقي سعيد اكتر
لو فشلت في الوصول لكاس العالم عن قاره لاتنتمي لها واوعدك لو لعبت مصر في قارة
اسيا او حاولت تتاهل عن الوطن العربي الكبيــــر من محيطه لخليجه فانا مش هيبقي
عندي اي مشكله وممكن اشجع المنتخب ساعتها ضد منتخب سوريا او المنتخب الملكي
السعودي.
المجد
للنجوم السـوداء.
